نئی دہلی: ہندوستانی سپریم کورٹ آج انڈین پریمیئر لیگ(آئی پی ایل) میں کرپشن اسکینڈل کا فیصلہ سنائے گا جہاں دو بڑی ٹیموں پر پابندی لگائے جانے کا امکان ہے۔
آئی پی ایل میں چنئی سپر کنگز اور راجستھان رائلز کے حکام پکے کرپشن اور جوئے میں ملوث ہونے کے الزامات ثابت ہو چکے ہیں اور اب تحقیقات کے کے بعد ان دونوں ٹیموں پر پابندی عائد کی جا سکتی ہے۔
واضح رہے کہ اس مقدمے کی تحقیقات کے دوران آئی سی سی کے سربراہ سری نواسن کو بھی کافی بدنامی کا سامنا کرنا پڑا اور فیصلہ ان کے مستقبل پر بھی گہرے اثرات مرتب کر سکتا ہے۔
ماضی کی آئی پی ایل ان دونوں ٹیموں پر پابندی کی صورت میں آٹھ ٹیموں کے اس ٹورنامنٹ پر گہرے اثرات مرتب ہو سکتے ہیں اور ماہرین کا کہنا ہے کہ راجندر مال لودھا کی زیر سربراہی قائم تین رکنی پینل ان پر بھاری جرمانہ عائد کر سکتا ہے۔
2013 کے آئی پی ایل سیزن کے دوران چنئی کے مالک گروناتھ میاپن اور راجستھان رائلز کے مشترکہ مالک راج کندرا کے جوئے میں ملوث ہونے کے الزامات ثابت ہوئے تھے جس کے بعد رواں سال جنوری میں اس معاملے کے فیصؒے کے لیے لودھا کو پینل کا سربراہ مقرر کیا گیا تھا۔
عدالت نے گروناتھ میاپن کے اس دعوے کو مسترد کردیا تھا کہ وہ صرف ٹیم کے ساتھ شائق کی حیثیت سے موجود تھے جبکہ ان کے سسر سری نواسن کو بھی ہندوستانی کرکٹ بورڈ میں کوئی بھی عہدہ دینے پر پابندی عائد کر دی تھی جہاں وہ 2011 سے 2014 تک تین سال تک بورڈ کے سربراہ رہ چکے ہیں۔
یاد رہے کہ اس معاملے کی تحقیقات کا آغاز 2013 میں ہوا تھا جس کے بعد مئی میں آئی پی ایل کے چھٹے ایڈیشن کے دوران ہندوستانی پولیس نے خصوصی آپریشن میں اسپاٹ فکسنگ کے الزامات میں راجستھان رائلز کے تین کھلاڑیوں سری سانتھ، انکت چاون اور اجیت چندیلا کو گرفتار کیا تھا۔
ان کھلاڑیوں پر الزام تھا کہ انہوں نے ایک اوور کے دوران جان بوجھ کر زیادہ رنز دینے کے لیے تقریباً ساٹھ لاکھ ہندوستانی روپے تک وصول کیے۔
آئی پی ایل کے سابق کھلاڑی امیت سنگھ کو بھی ان تینوں کھلاڑیوں کے ساتھ روابط رکھنے پر گرفتار کیا گیا تھا۔
بعد میں ان تینوں کھلاڑیوں اور امیت نے اپنے جرم کا اقرار بھی کر لیا تھا۔
تحریر کے بارے میں اپنی رائے بھیجیں