امریکہ کی خلائی ایجنسی ناسا نے ’کیوروسٹی‘ نامی مریخ گاڑی کی کھینچی ہوئی اپنی تصویر یعنی ’سیلفی‘ جاری کی ہے۔
ناسا ہر اس جگہ متعدد تصاویر لینے کی کوشش کرتا ہے جہاں کیوروسٹی مریخ کی سطح پر ڈرلنگ کرتی ہے۔
کیوروسٹی نے یہ تازہ تصاویر ’بک سکن‘ کے مقام پر لی ہیں۔ یہ مقام اس مشن کے ہدف کی ساتویں چٹان ہے جہاں سے اسے تجزیے کے لیے نمونے فراہم کرنے ہیں۔
یہ تصاویر اس سے قبل بھیجی گئی تصاویر سے مختلف ہیں اور یہ نچلے زاویے سے لی گئی ہیں۔
کیوروسٹی نے یہ تصویر ایسے ہی لی جیسے کوئی انسان کیمرا ہاتھ میں پکڑ کر اور بازو لمبا کر کے اپنی سیلفی لیتا ہے۔
کیمرے نے تصویر لینے کے لیے کیمرے کا ’ماہلی‘ نامی عدسہ استعمال کیا۔ عام طور پر یہ عدسہ چٹانوں میں معدنیات کو قریب سے سمجھنے یا جانچنے کے لیے استعمال ہوتا ہے۔ لیکن اسے بہت دور واقع چیزوں پر بھی مرکوز کیا جا سکتا ہے۔
انجینیئروں نے ماہلی کو مریخ گاڑی کی مزید تصاریر بھیجنے کی ہدایت کی ہے۔ ان تصاویر کو ایک ساتھ جوڑ کر ایک پینوراما بنایا جائے گا کہ تمام منظر واضح ہو سکے۔
بک سکِن میں کیوروسٹی سے تھوڑی دور سطح میں ڈھلان ہے۔ جس کا مطلب ہے کہ روبورٹ یہاں چٹان سے ٹکرانے کے خطرے کے بغیر اپنا کیمرا نیچے لے کر جا سکتا ہے۔ یہ پہلے بھیجی گئی سیلفی کے مقابلے میں نیا منظر ہے جس میں کیوروسٹی کے سامنے کا حصہ اور پیٹ زیادہ نظر آئےگا۔
مریخ گاڑی کے سامنے دو سرمئی رنگ کےٹکرے ہیں۔تکونی ٹکڑا اس جانب ہے جہاں روبوٹ نے بک سکن میں سوراخ کیا ہے۔ 1.6 سینٹی میٹر کا گول ٹکڑا اس جگہ ہے جہاں ڈرل زمین میں گئی تھی۔ گاڑی کی قریب سرمئی ٹکڑا چٹان کا ذرہ حجم میں بڑا ہے جسے کیوروسٹی میں موجود تجربہ گاہ میں تجزیے کے لیے بھیج دیا گیا ہے۔
کیوروسٹی کو مریخ پر گئے تین سال ہوگئے ہیں۔ یہ اس وقت ایک گہرے استوائی پیالہ نما جگہ پر ہے جسے ’گیل کریٹر‘ کے نام سے جانا جاتا ہے۔ اس کے بیچ میں ایک بڑا پہاڑ ہے جس کو غیر رسمی طور پر ’ماؤنٹ شارپ‘ کا نام دیا گیا ہے۔
اس وقت کیوروسٹی اس کے دامن سے ہوتی ہوئی اوپر چڑھ رہی ہے اور چٹان کی جانچ پڑتال کر رہی ہے۔
اب تک تجزیوں میں یہ بات سامنے آئی ہے کہ کروڑوں سال قبل کریٹر پر تالاب تھا۔ کیوروسٹی کے اکٹھے کیے ہوئے نتائج سے تالاب میں ماضی میں بہتے ہوئے پانی کے ثبوت ملے ہیں۔
سائنس دانوں کا کہنا ہے کہ اس وقت کے حالات بتاتے ہیں کہ شاید یہاں کسی دور میں جرثومی زندگی بھی پائی جاتی ہو۔
کیوروسٹی جیسے جیسے پہاڑ پر چڑھ رہی ہے امکان ہے کہ اسے مریخ کے خشک ہونے کے ثبوت مل جائیں۔ آج مریخ مکمل طور پر خشک اور سرد ہے۔ سائنس دان جاننا چاہتے ہیں کہ ایسا کب اور کیسے ہوا۔
تحریر کے بارے میں اپنی رائے بھیجیں