غیر ملکی خبر رساں ادارے کے مطابق وکی لیکس کے بانی جولین آسانج پر عائد چار میں سے دو مقدمات کو ختم کیا گیا ہے جن میں سے ایک کا تعلق جنسی طور پر ہراساں کرنے اور دوسرے کا تعلق زور زبردستی سے ہے۔ اسی طرح جنسی حوالے سے پریشان کرنے کے ایک اور مقدمے کی میعاد بھی 18 اگست کو ختم ہو رہی ہے۔ آسانج پر آبروریزی کا جو مقدمہ قائم کیا گیا ہے جو 2020ء تک جاری رہے گا۔سویڈش قانون کے مطابق اگر کسی مشتبہ شخص کے ساتھ ایک خاص مدت تک پوچھ گچھ نہیں ہو پاتی تو اس کے بعد اس سے ان الزامات کے بارے میں تفتیش نہیں کی جا سکتی۔ جولین آسانج دو سویڈش خواتین کی جانب سے عائد کردہ ان تمام الزامات کو مسترد کرتے ہیں اور ان کا مؤقف ہے کہ ان خواتین کے ساتھ ان کے جنسی روابط باہمی رضامندی سے قائم ہوئے تھے۔ دوسری جانب جنسی استحصال کی تحقیقات کے خاتمے کے باوجود جولین آسانج کا ایکواڈور کے سفارتخانے سے باہر آنے کا ارادہ نہیں ہے۔ وہ پہلے ہی واضح کر چکے ہیں کہ اگر جنسی جرائم کے الزامات واپس بھی لے لئے جائیں تب بھی وہ باہر نہیں نکلیں گے۔ جولین آسانج کو خطرہ ہے کہ امریکا کے حوالے کر دیا جائے گا۔ واضع رہے کہ جولیان آسانج وکی لیکس نامی ویب سائٹ کے بانی ہیں۔ اس ویب سائٹ نے 2010ء میں اس وقت شہرت حاصل کی جب اس نے تقریباً ساڑھے سات لاکھ خفیہ امریکی دستاویزات آن لائن شائع کر دی تھیں۔ لندن میں ایکواڈور کے سفارت خانے میں پناہ لینے کے بعد سے برطانوی پولیس اس کی نگرانی اور تحفظ پر ایک کروڑ 20 لاکھ پاؤنڈ خرچ کر چکی ہے۔
تحریر کے بارے میں اپنی رائے بھیجیں