سام سنگ گلیکسی ایس ایٹ کو اس وقت بہترین اینڈرائیڈ فون قرار دیا جاتا ہے تاہم چینی کمپنی شیاو ¿می نے اسی جیسے فیچرز کی ڈیوائس اپریل میں متعارف کرائی تھی اور اب یہ پاکستان میں فروخت کے لیے پیش کی جانے والی ہے۔
اپریل میں شیاﺅمی نے اپنے نئے فلیگ شپ فون می سکس کو متعارف کرایا تھا اور اگلے ہفتے اسے پاکستان میں بھی پیش کیا جارہا ہے۔
5.15 انچ اسکرین کی ڈیوائس میں گلیکسی ایس ایٹ کی طرح اسنیپ ڈراگون 835 پراسیسر، سکس جی بی ریم، 64 جی بی اسٹوریج، 12 میگا پکسل کے دو بیک کیمرے، ڈوئل اسٹیریو اسپیکرز، 3350 ایم اے ایچ بیٹری اور واٹر ریزیزٹنس جیسے فیچرز موجود ہیں۔
اس کا کیمرہ اس لیے بھی قابل توجہ ہے کیونکہ کمپنی کا دعویٰ ہے کہ اس میں ٹیلی فوٹو لینس کے ساتھ وائیڈ اینگل لینس دیا گیا ہے جیسا آئی فون سیون پلس کے کیمرے میں ہے۔
بس اس کا ڈیزائن ایس ایٹ جیسا خوبصورت نہیں قرار دیا جاسکتا کیونکہ سام سنگ کا فون بیزل لیس فون ہے۔
تاہم شیاﺅمی کے فون میں 2x2 ڈوئل وائی فائی کا فیچر دیا گیا ہے، یہ ایسی ٹیکنالوجی ہے جو وائرلیس نیٹ ورکس پر کنکٹیویٹی اور رفتار کو بہتر بناتی ہے جبکہ اس میں رات کو بینائی کو بچانے کے لیے الٹرا ڈارک موڈ بھی دیا گیا ہے۔
اس کے سکس جی بی اور 64 جی بی اسٹوریج والے فون کی قیمت 363 ڈالرز (لگ بھگ 38 ہزار پاکستانی روپے) جبکہ 128 اسٹوریج والا فون 421 ڈالرز (44 ہزار پاکستانی روپے سے زائد) ہے اور اس کے مقابلے میں گلیکسی ایس ایٹ 87 ہزار روپے کا ہوگا یعنی یہ پچاس فیصد سستا ہے، جبکہ ہیواوے پی ٹین کی قیمت 696 ڈالرز ہے۔
تاہم 21 اگست کو پاکستان میں فروخت کے لیے پیش کیے جانے والے اس فون کی قیمت کیا ہوگی، ابھی یہ واضح نہیں۔
اس کے علاوہ کمپنی کی جانب سے آئندہ ہفتے می میکس ٹو کو بھی متعارف کرایا جائے گا۔
تحریر کے بارے میں اپنی رائے بھیجیں