محمد نام کو ایک بار پھر برطانیہ اور ویلز میں لڑکوں کے لیے سب سے مقبول ترین نام قرار دیا گیا ہے۔
برطانیہ کے محکمہ شماریات (او این ایس) کی جانب سے 2016 کے مقبول ترین ناموں کی فہرست جاری کی گئی جس میں بظاہر اولیور نام سرفہرست ہے مگر پھر بھی محمد نام کو سب سے مقبول قرار دیا گیا ہے۔
اس کی وجہ محمد نام کے انگلش ہجوں یا اسپیلنگ میں فرق ہے۔
برطانوی محکمے کی فہرست کے مطابق Muhammad نام 8 ویں، Mohammed 31 ویں جبکہ Mohammad 68 ویں نمبر پر موجود ہے۔
جب ان سب ہجوں والے ناموں کا ڈیٹا اکھٹا کیا گیا تو یہ 7084 بچوں کا نام نکلا جبکہ نمبرون پر موجود اولیور نام 6623 بچوں کا تھا۔
اس فہرست میں سو سرفہرست ناموں میں محمد نام 3 جگہ پر اپنے اسپیلنگ کے فرق کی وجہ سے ہے ورنہ سب کا مطلب ایک ہی ہے۔
برطانوی محکمے کے مطابق محمد نام مقبولیت کے اعتبار سے سرفہرست سو ناموں میں پہلی بار 1924 میں داخل ہوا تھا جس کے بعد سے اس کی مقبولیت میں ہر گزرتے برس اضافہ ہورہا ہے۔
گزشتہ دس برسوں میں یہ نام زیادہ تیزی سے اوپر آیا ہے، جس کی ایک ممکنہ وجہ برطانیہ اور ویلز میں مسلم آباد ی میں اضافہ ہے جو اس وقت مجموعی آبادی کے پانچ فیصد حصے کے برابر ہے۔
ماہرین کا کہنا ہے کہ یہ نام تو ایک ہی ہے مگر یہ لوگوں پر ہے کہ اس کے ہجے یا اسپیلنگ کیسے کرتے ہیں، مگر سب کا مطلب ایک ہی ہوتا ہے۔
اس سے پہلے 2014 اور 2015 میں بھی محمد نام برطانیہ میں سرفہرست رہا تھا، جبکہ لڑکیوں میں اولیویا نام مقبولیت میں سب سے اوپر رہا۔
تحریر کے بارے میں اپنی رائے بھیجیں